O se vaaiga sa solo maimoa iai le atunuu e alala tulalata mai i le taulaga o Apia le feilafi o lanu eseese o moli emoemo o le Kerisimasi sa teu ai nisi o ofisa o le Malo, aemaise sa mataina ai lava moli emoemo ma teuga o le Kerisimasi o le maota fogafale lima o le NPF i Apia.
O ni teuga sa faatino ona o le faaaliga o moli le festival of lights, i taimi o pulegamalo ua tuanai.
Faaalia e le Minisita o Tupe o se finagalo lelei na faia ai lea faaaliga o moli auā sa faamaite i lena taimi o pulegamalo ua mavae ona o le faamai Koviti-19, ae peitai ua faia le faaiuga a le komiti faatonu o le NPF e sili le tapena o le meaalofa o le tufatufaga e pei ona iai le 2 tesimale 4 pasene ae tuu moli emoemo ma isi teuga sa faaalu ai tupe a le faalapotopotoga.
Faaalia e le taitaifono o le Komiti faatonu o le NPF, le susuga Papalii Tavita Moala, e 80 afe tala na faaalu ai e le NPF i moli emoemo ma teuga o le kelisimasi sa teu ai le fale atoa, ae lē faitaua ai ma le totogi o le eletise.
Ua na o le nofoaga o loo iai le maota Samoa o le pulega o tagata tafafao ma luma maota o le Malo o loo vaaia ai i le po teuga o moli emoemo felanulanua’i o le Kerisimasi.
