O le faamanatu ai o le 8 tausaga o le tautua a le faletupe a le Pasefika i Samoa poo le Bank of the South Pacific (B.S.P) talu mai le 2015 sa faavaeina ai, ua telē sona sao i auaunaga tau seleni a le mamalu o le atunuu.
O lenei faamoemoe na avea ai le Minisita o Tupe, Mulipola Anarosa Ale Molioo e saunoa ai i le tautua a lenei faletupe i le tamaoaiga o Samoa.
“Talu le faavae mai o le faletupe a le Pasefika e ala i auaunaga tau seleni, o se fesoasoani tele lea i o tatou tagata, pisinisi aemaise le atina’eina o le tamaoaiga a le atunuu.
“O loo amanaia le tautua a lenei faletupe i le mamalu o le atunuu e le gata i lea o ana poloketi o loo mafai ona sasaa mai ai fesoasoani i soo se vaega o atina’e ua lē na o Samoa ae o isi atunuu o le Pasefika.
“E faafetaia ai lenei faletupe i lo latou agalelei faifaipea o loo mafai ona molimauina e le mamalu lautele i ana auaunaga.
“E fai ai a’u ma sui o le Malo aemaise le atunuu e faamanuia ai lenei laasaga o le tautua a le B.S.P i ona faauluuluga aemaise i latou o loo galulue ai mo lau tautua i le atunuu ma le Pasefika atoa.”
O nisi o vaega o loo mafai ona agalelei ai lenei faletupe e ala lea i le lagolagosua i aulakapi ma nisi o taaloga i le atunuu.
