E $7 miliona lea ua malie le malo e ave ma le Ruapehu Alpine Lifts.
Ua sau ma le tala agai i le pisinisi faasee i luga o le aisa, o le fesoasoani tupe mulimuli lea mo i latou e tusa ma faamalamalamaga mai le minisita o atinae Shane Jones.
O le fesoasoani tupe faitau miliona lona lima lea ua tuuina atu i le nofoaga faasee i le aisa i Ruapehu i totonu o le 18 masina.
Na saunoa le minisita ananafi o le $7 miliona ua toe tuu atu iai, o le naunautaiga ia mafai ona tatala mo faaseega i le vaitau malulu o lenei tausaga.
Na ta’ua ai foi e le minisita e lē mafai ona faalagolago mai i le malo e faaauau ai pea le fesoasoani atu e tusa lava pe lē toe maua se isi e faatauina le pisinisi.
O le masina talu ai na toe savali ese ai Tom Elworthy lea na tauofo na te faatauina le pisinisi.
I le fesiligia ai o le minisita pe aisea e faaalu ai pea e le malo le faitau miliona mo pisinisi faasee i le aisa na i lo le ave e faaleleia ai totogi o leoleo poo meaai foi a fanau aoga, ae na tali Jones, o tupe lava nei na tuu ese mo le atinaeina o pisinisi.
