O le fesoasoani lenei a le Malo o Iapani na faatino i le taeao nei ma sui o le komiti a le Kolisi o Avele e ala lea i le fausiaina o se hall mo polokalame ma faatasiga a le Kolisi.
O le hall o le a fausia e aofia ai ma se umukuka e tapena ai meataumafa ma le falelēta’ua.
O se fiafiaga foi lea i le Peresitene a le Komiti Tagaloatele Pasi Poloa aemaise le Kolisi ona o le fale sa faaaogāina i tausaga ua mavae ua lē gafatia ona toe faatino ai potopotoga a fanau aoga.
“Ua lua tausaga talu ona talaina i lalo le fale sa fai lava ma hall a le aoga a faapea na silasila ai e fai si maualalo ma a oo ina louloua le tau ona sao atu lea o le vai i totonu.
“Ona faatino lea o polokalame i le hall a tama ma teine tuai ae peitai e fai si maomao mai i lalo le isi vaega o le lotoā.”
O lenei fesoasoani ma le fuafuaga o lenei galuega na faailoa e Tagaloatele o le a mautu ai loa le fale mo le Kolisi ma ana faatasiga.
“O aso la o le iai lava o se fale tele e fausia i le Kolisi ua faaigoa o le hall ona o na vaitaimi e na o le 100 fanau aoga ae o le taimi lenei ua toatele le fuainumera o tamaiti e ao ai foi la ona telē se fale.”
Saunoa foi le Pule Aoga, Sooalo Otilia Sooalo, “E iai le faamoemoega o le tausaga mulimuli lenei o le a faaaogāina ai e le Kolisi le hall a le E.F.K.S. i Mulinuu i ana laugatogi atonu o le tausaga fou o le a faatino loa i lona hall fou lea o le a fausia.”
Na momoli le faafetai a le komiti i le Malo o Iapani e tauala atu i le Amepasa ma lona ofisa i Samoa nei mo le fesoasoani tele o le a faafoeina ai le galuega.
