O le afiafi nei lea na faatautaia ai le tufatufaina o faailoga mo sā e lima lea na tauva i le taeao analeila i tuuga fautasi e faailo ai le faamanatuina o le 60 tausaga o le Tutoatasi o Samoa.
O le Afioga i le Palemia Fiame Naomi Mataafa na saunoa e talimasineia ai le faamoemoe i le asō.
“Faafetai i le Atua ua tau lau o le faamoemoe i le faagatama i le tai e faailo ai le faamanatuina o le 60 tausaga ua tatou faasolo atu nei i le si’ui o le faailogaina o le 60 tausaga ae o le isi faailo tāua lenei o le toe lalaga mai o le tatou taaloga i le tai.
“Faafetai ia outou afioga i kapeteni ma auvaa aemaise foi afioaga ma faalapotopotoga o ē na tali mai ua mafai ai ona o tatou faatinoina lenei faamoemoe.
“Oute talitonu i le tele foi o tausaga a o faagasolo mai le matamata atu i lenei taeao matagofie e pei ua usitai ma amio lelei uma vaa ua le ulavavale e pei o isi tausaga.
“O itu ia e atagia ai le laalaa pea i luma o le faamoemoe o soo se taaloga ina ia pulea lelei le faatinoina o le faagatama, o lea e momoli ai le faamalo ma le faafetai i le faatinoina o le faamoemoe.
“Faamalo atu i le tatou auvaa lea na tulai mai i le tofi o le manumalo mo lenei tausaga.
“Ua sola foi ma Salafai, e lu’i ai tatou iinei i Upolu ma Aiga i le Tai i le tausaga fou atonu e toe lalaga mai nisi o sā o taooto pea ma malolo poo fuafua foi e auai i nisi tuuga i se tausaga oi luma.”
O le tulaga muamua e pei ona silafia ai le Tolotolo o Tamauli mai le afioaga o Salelologa i le Motu tele i Salafai lea na manumalo i le faailoga tupe e $60,000 ma le ipu, tulaga lua le sā a le Aoga Matata Eseese a Don Bosco i Alafua mo le faailoga tupe e $50,000, tulaga tolu le sā o le Telefoni o le Vainuu mai Aiga i le Tai mo le faailoga tupe e $40,000, tulaga fā le sā o le Little Rina mai le afioaga o Toamua mo le faailoga tupe e $30,000 ma le tulaga lima lea na taumafai mai ai le sā o tama ma teine tuai a le Malisi mo le faailoga tupe e $20,000.
