O le faiga taulaga ma meaalofa tupe i le lotu faamanatu o le taeao fou o le Talalelei a le Ekalesia Faapotopotoga Kerisiano Samoa i le afioaga o Sapapalii na aoina ai se foai e silia i le 260 afe tala.
O le Aso Lulu o lenei vaiaso le aso 24 o Aokuso na faatino ai lea sauniga lotu faamanatu e faia i tausaga taitasi e le ekalesia, e faamanatu ma manatua ai le aso tonu lea na taunuu ai le lotu kerisiano muamua i Samoa na aumaia e le alii misionare o Ioane Viliamu o le sosaiete a misionare Lonetona i Peretania le LMS, lea ua suia nei le igoa i le Ekalesia Faapotopotoga Kerisiano Samoa poo le EFKS.
O le sauniga o le lotu faamanatu o le taeao fou i lenei tausaga, ua faatāua i le polokalame a le Malo o le faamanatuina o le 60 tausaga o le Tuto’atasi, o le mafuaaga lea o le masii o le Malo mai lava i le afioga i le Ao o le Malo ma lana Masiofo, faapea le tamaitai Palemia ma Minisita o lana Kapeneta, aemaise o le Fofoga Fetalai o le Palemene.
O le sauniga foi lea na faailoga ai ma le atoaga o le 192 tausaga talu ona taunuu le Lotu i Samoa talu mai le aso 24 o Aokuso o le tausaga e 1,830, lea na toai taunuu i Mataniu Feagaimaleata i Sapapalii i Savaii.
O faiga meaalofa tupe ma taulaga o le lotu faamanatu o le taunuu o le talalelei i Samoa, na foai ai e le Malo le 60 afe tala.
O le faaupuga o le meaalofa lenei, o le 20 afe e tauala atu i le ekalesia EFKS i Sapapalii ma le 40 afe tala e tauala atu i le ekalesia aoao.
Sa faamauina foi foai ma taulaga mai malo valaaulia faapea tamafanau a Sapapalii o loo aumau ‘ai taumalele i atunuu e mamao.
O le mafutaga a tamafanau a le afioaga i Niu Sila o le latou taulaga tuufaatasi e tasi le selau afe tala.
