E ono ni mataupu sa tagofia e le faamasinoga sili a le atunuu, o le a toe suesueina faaiuga e le Faamasinoga o Talosaga Apili, pe a tauaofia lea faamasinoga i le aso 7 o le masina fou o Novema.

Ua aofia i mataupu ua faatulaga e toe suesueina, le faaiuga i le mataupu i le nofoa faaopoopo o tamaitai i le Palemene, lea na filifilia ai le afioga Toomata Norah Leota ma maua ai le aofaiga e fitu o tamaitai i le paeaiga lona 17 a le Palemene.

O loo lu’i e isi faipule tamaitai e toalua na faamaonia foi lo la filifilia i aiaiga o le 10 pasene, le afioga Aliimalemanu Alofa Tuu’au, ma Faagasealii Sapoa Feagia’i le faaiuga na filifilia ai Toomata Norah, ae o loo apili foi e Toomata le faaiuga lava lea na filifilia ai Aliimalemanu Alofa ma Faagasealii Sapoa.

O isi mataupu o le a toe suesueina faaiuga, o le mataupu a Kolani Junior Lam o loo tuli lona faasalaga faafalepuipui, faasaga i le Loia Sili a le Malo.

Mataupu i le va o Afuvai Norris Siaosi ma Meresaini Siaosi Laulua faasaga ia Faaolesa Katopau Ainuu ma Te’o Faitele Afamasaga.

O le isi talosaga apili o le a suesueina o le mataupu a Talosaga Wales Amosa faasaga i Leoleo ma le Loia Sili, mataupu a Lui Feseeta’i faasaga i leoleo ma le Loia Sili a le Malo, ma le talosaga apili a Mapu Saei Jamias faasaga ia Angela Sophronia Frost Kelsall, Wendell Fredrick Frost, ma Wilma Evelyn Frost.

O le tauaofiaga mulimuli lea a le faamasinoga o talosaga apili a le faamasinoga maualuga mo lenei tausaga ua tau faaiuiu.

E faalua ona tauaofia lea faamasinoga tāua a le atunuu i le tausaga.