O le tala faatatau autu o le tupe a le Malo o Ausetalia e tusa ma le tasi tesimale 9 piliona tala Ausetalia, ua faatatauina ai ma se vaegatupe e tusa ma le 53 tesimale 5 miliona e fesoasoani ai i fuafuaga o le atina’e o le tamaoaiga o Samoa mo le tausaga faaletupe 2023 i le 2024.

Ua faailoa lea aofaiga o tupe o le a fesoasoani ai lea Malo ma ta’ua ai ua siitia fesoasoani o le atina’e a Ausetalia mo Samoa i le tausaga faaletupe o le a sosoo ai nei.

Ua faaalia e le Haikomesina o lea Malo i Samoa le tamaitai Haikomesina o Emily Luck, ua taoto le ioega a lona Malo e tuu mai lona tau’au e tausoa faatasi ai ma le Malo o Samoa fuafuaga o le atina’e o le tatou atunuu e pine ai le galulue faatasi o malo e lua.

Ua faailoa foi e le tamaitai Haikomesina o Ausetalia i Samoa o le siitia o fesoasoani tau le atina’e a lona Malo ua faasoa atu foi i isi malo o le Pasefika e avea ma lagolago malosi i le atina’e o tamaoaiga mo le manuia o tagata o le Pasefika.