O lea ua taua’ao e le afioga i le Ao o le Malo le afioga, Tuimalealiifano Vaaleto’a Sualauvi II tusi taualoa o le tofiga o le amapasa fou o le malo o Pelesauma poo Belgium mo Samoa, ae faamautu i Canberra le laumua o le atunuu o Ausetalia.

O le aso Tofi ua mavae i se sauniga i le maota faalemalo o le Ao o le Malo i Vailele na taua’ao ai tusi tofiga o le amapasa o Michel Goffin ma ia faailoa ai le tumau pea o faiga paaga a malo e lua, aemaise i totonu o le Iuni a Europa lea o loo mafuta faatasi ai ma atunuu o loo avea ma sui o le faalapotopotoga o atunuu aferika, kerepeane ma le Pasefika.

Sa ave ai le faafetai a le afioga i le Ao o le Malo i le sui o Pelesauma i le fesoasoani a lea malo ia Samoa i le Faalapotopotoga o Atinae a Europa o loo maua ai seleni e faaleleia ai o tatou suavai taumafa ma le puipuia o le soifua maloloina mai vai lafoai.

O le amapasa lea o Pelesauma mo Samoa ma Ausetalia faapea isi malo o le Pasefika.