O le lu’i ua tuuina e le Peresitene ma le komiti o asosi o taaloga a Samoa i le ‘au a le atunuu o le a faimalaga atu i taaloga o le Pasefika i Solomona i le masina nei ia ausia ni pine auro e 50.
Saunoa le Peresitene, Pauga Talalelei Pauga o le silasila lea ma le vaai mamao a le komiti i le ‘au a Samoa ua mae’a tapenaina.
“O se vaega tāua sa matou tilotilo iai o le tele o taaloga ua mae’a atu o le tulaga e ausia e Samoa o le tulaga tolu.
“O le taaloga a le Pasefika i le 2019 toe tasi a le pine sa sili ai Papua Niu Kini ia tatou tatou tulai mai i le tulaga lua.
“Ae o le faamoemoe lea ua ave iai ua tatau ona tatou numera tasi e iai a le maualuga e pei ona iai nai taaloga ia e pei o le body building o le a fou mai i totonu o le tatou siosiomaga e iai le faamoemoe e maua ai nisi a tatou pine.
“O le tala lea ua aumai e sui o taaloga nei e na o i latou e ausia pine auro siliva apamemea.
“Ua mae’a foi ona ave iai le tala afai ae lē maua se pine a lau sport i taaloga nei, e faamalulu atu seiloga lava e lelei au records i lau tapenaga faatoa tau maua se avanoa mo le isi taaloga o le Pasefika ae mautinoa e leai se avanoa.”
O le aso 10 o le masina nei o loo fuafua e savalia ai e le autaaalo a le atunuu lumāmaota o le Malo mo se sauniga ma tuuina mai ai se faamanuiaga a le Malo a o lei malaga atu mo le faamoemoe i Solomona.
