Mo fuafuaga tau tupe a lo tatou Malo o le Aso Lua o le vaiaso nei na faamautu ai se fesoasoani tau tupe a le Malo o Ausetalia e tusa lona aofai ma le 91 miliona tala Samoa, poo le 50 miliona tupe Ausetalia.
O lea fesoasoani o le a tuuina mai i totonu o le valu tausaga ma e faasoa atu lea i fuafuaga o le tala o le tupe a le Malo lea ua ta’ua o le General budget support.
O le vaiaso nei na sainia ai e le Komesina Maualuga o Ausetalia i Samoa ma le Minisita o Tupe le faamautuina o lea fesoasoani tau tupe mo fuafuaga a lo tatou Malo i lana faasoa tau tupe mo galuega eseese o le atinae o le tatou tamaoaiga.
O se tasi lea o fesoasoani a Ausetalia ua faamautu e le sui o lea Malo mo Samoa, a o lei tuua le atunuu ina ua mae’a lona taimi galue sa avea ai ma Komesina Maualuga.
