Ua faailoa atu e le alii o Semisi Aliimatafitafi i le Faamasinoga Maualuga ananafi e lē o toe manao i se loia e tulai mo ia ae o le a tali lava o ia i ona moliaga i le taimi e suesue ai mau.
E fitu moliaga o loo molia ai lea alii, o le moliaga o le fasioti tagata faamoemoeina, o le fasioti tagata paivalea, umia o se aupega matautia, faapā o se laau malosi, umia o se aupega e lē faatagaina i le atunuu, le moliaga e ta’ua o le presenting firearms, ma le umia o ututau.
Na talia e le Faamasinoga le talosaga a le tamaitai loia sa tulai mo Semisi ina ia faasee ese mai le toe tulai mo Semisi i le Faamasinoga, ona o le tulaga e lē talia e lea alii nisi o fautuaga sa tuuina atu iai, ae o le toe valaauga ananafi na fesiligia ai le mafuaaga o le lē toe manao o lea alii i sana loia ma ia faailoa ai o ia ua manao e tu lava mo ia lava ona o lona manao ia tali ioe i moliaga uma se’i vagana le moliaga autu o le fasioti tagata faamoemoeina e tumau pea ona ia teena.
Ua toe tolopo nei e le alii faamasino o Fepuleai Ameperosa Roma lea mataupu i le aso 12 o Fepuari se’i toe tilotilo le itu a leoleo i le moliaga autu lea ua teena e lea alii, atoa ai ma le tuuina atu o se avanoa i le faamasinoga e toe tagai ai pe talafeagai le talosaga a lea alii e lē toe manaomia se loia e tulai mo ia.
O se faalavelave na tulai mai i Faatoia ia Aokuso o le tausaga ua mavae na maliu ai se tama talavou i se aupega o se laau malosi ma o loo masalomia ai lē ua molia.
O lea faalavelave o loo masalomia ai le sootaga atu i fualaau faasāina.
