O le amanaiaina o tagata faigaluega i soo se auaunaga o se tasi lea o vaega tāua e faailo ai lana tautua i soo se matata e pei ona iai le faaaloalogia ma amanaia e le Pulega o Vaa ma Uafu le tina ia Ioana Paulo Avefua mai le motu tele i Salafai.
O Avefua ua mae’a ana aoaoaga i vaega tau Kapetenei o le Maligi (marine) ma o loo ia umia se tusipasi o le vaega 4 o le Master Class 5 mai le Aoga a le Maligi a le Iunivesite Aoao o Samoa.
I lipoti sa faatino se sauniga e aloaia ai ona tuuina le faailoga a o molimauina e sui o le laulau o Faatonu, pulega o le aufaigaluega aemaise aiga.
I le saunoaga a le Taitaifono ia Tuiloma Neroni Slade na ia faafetaia ai le loto finau ma le tauivi o lenei tina.
“O se tala faamalosiau ma le fiafia lenei aso o le faataitaiga lea o le unaia o tina ma tamaitai aemaise o se talafaasolopito fiafia lenei mo le Pulega o Vaa ma Uafu e ala i le taumafai o le Susuga i le Kapeteni ia Ioana sa tuu iai le loto atoa, o ā vaega o fai ma faafitauli na manumalo ai ma le atagia o avanoa tutusa i soo se taleni ma agavaa.
“Capt. Ioana, Malo, faafetai ta’imua, ia manuia lou alo atu i lenei galuega ma tofiga tāua. Alofagia e le Atua lau galuega ma lou tomai”.
Na faaalia e Avefua o le amataga lea o nisi avanoa mo ia e ala i lea matatia ua ia ausia.
“Ou te tulai atu o a’u o se faataitaiga mo i latou e tele le tomai ma le mafai e faatino ai se mea, tetee atu i nisi o vaega o loo fai ma papuipui o le ola tauivi i agavaa faapenei.
“E le gata ai le taumafai ma o le amataga lea o se isi laasaga fou o le ola auauna i le atunuu.”
E pei ona silafia o nei tomai ma agavaa e mātele lava i le itupa o alii ae peitai o lea ua faailoa e Avefua o soo se tasi lava e mafai ona ausia nei vaega pe a finau ma faamaoni.
Na amata galue Avefua i le Pulega o Vaa ma Uafu i le tausaga e 2013 ma filifilia ai o se Able Bodied Seaman ona avea ma se tasi e iai i le aoaoga tau Kapeteni ma faasolo ai ina siitia i le aoaoina o tomai tau Pilot.
