E 325 moliaga faaopoopo a leoleo ua tuuina atu i le faamasinoga faasaga ia Seira Malifa o se tamaitai sa galue i le faletupe o le ANZ i Samoa, lea o loo tuuaia i le toesea o se tinoitupe e tusa ma le $1.5 miliona tala o se meatotino a lea faletupe.
E lei faamautuina se tali a lē ua tuua’ia i moliaga faaopoopo, o le mafuaaga lea o le toe tolopo o le mataupu i le aso 19 o Iuni, se’i tālia ai se feiloaiga a lē ua molia ma lana loia e faatatau i moliaga faaopoopo a leoleo.
O le avanoa foi lea e pei ona faailoa e loia a leoleo i le faamasinoga o le a tapena atu ai nisi moliaga faaopoopo e lei faamautuina i le taimi nei.
O Novema o le tausaga na tea nei na faailoa ai e leoleo le tuuina atu o se tusi ai le faletupe na faailoa atu ai le mataupu lenei ma amata ai loa suesuega.
Na faatino foi e le faletupe se sailiiliga faalotoifale lea ua taunuu i le faia o isi moliaga faaopoopo.
