E $300 miliona ua faailoa mai e le malo o le a tuuina mai mo galuega toe faaleleia faapea pisinisi ua aafia ona o le afā.
O loo aofia i totonu o lenei tupe tele le $50 miliona e fesoasoani ai i pisinisi ma ua polomisi le minisita o tupe Grant Robertson ua na o se tupe e amata ai ae e toe faaopoopo mai.
O lona faasoaina o le a faailoa mai i le vaiaso nei, ma e tatau ona faaalu i galuega o loo moomia vave atoa ai ma galuega faamamā.
O le isi uma vaega e totoe, le $250 miliona o lea ua tuu ese mo le toe faaleleia o auala auā feoaiga.
O auala foi nei e le gata i auala tua ae faapea highways.
O nei fesoasoani tupe na ioeina e le Kapeneta i lana fonotaga ananafi, ma o se fonotaga foi na autasi ai e toe faaopoopo le isi vaiaso e aloaia ai pea poloaiga o faalavelave faafuasei poo le state of emergency mo Aukilani, Northland, Tairawhiti, Waikato, Bay of Plenty, Tararua ma Hawke’s Bay.
O le toe faaopoopo o le piriota o poloaiga o faalavelave faafuasei mo vaega nei o le North Island ua faia ai mo le National Emergency Management Agency a o ia vaaia pea nuu ua aafia aemaise o galuega faaleleia.
