E silia i le 300 laau faasāina o le maruana na maua i se osofaiga a leoleo na alu i le nofoaga o Afulilo ma ua taofia ai nei ni alii se toalua e 16 ma le 22 tausaga le matutua.

Faaalia e le sui Komesina o leoleo i le feiloaiga ma le vasega o tusitala, na maua ai foi ma ni laau malosi poo fana. O lea foi ua faailoa e leoleo e lua ni faalavelave tau taavale na tutupu i le Aso Sa na tea nei, o le tasi o ia faalavelave sa tupu i Tufulele ua maliliu ai ni alii se toalua, ae o le faalavelave i Salani Falealili e toasefulu tagata na malaga i se pikiapu na manunua ai.

Ua mae’a ona togafitia i le falemai ma toe tetea i tua i o latou aiga. O loo faia pea suesuega a leoleo i le mafuaaga o ia faalavelave tau taavale.

I suesuega o loo faaauau i vevesi na aafia ai nisi o fanau aoga, ua faaalia e le sui komesina o leoleo le susuga Papalii Monalisa Tia’i Keti, ua lapataia fanau na aafia i lea vevesi e leai ni moliaga i lalo o aiaiga o le Tulafono o loo puipuia ai fanauiti ma tupulaga talavou, peitai a alu alu suesuega ae maua ni mau e lagolago ai ni solitulafono e fesootai i tulaga na aliali mai, o le a faia loa moliaga ma tuuina atu i le faamasinoga.