O le pipisi ai o le faama’i o le tale vivini i Samoa ma to’aono o tagata ua faamaonia ua aafia i le faama’i, ua faailoa i luga o auala o fesoota’iga a le matagaluega o le soifua mālōlōina e le Sui Faatonu Sili le afioga Tagaloa Dr Robert Thompsen e 30 tagata ua masalomia ua aafia foi i āuga o lea faama’i.
O faamaumauga ia a le matagaluega o le soifua mālōlōina i le va o le masina o Oketopa ma Novema ma ua faatali le taunuuga o su’esu’ega pe o ai nisi ua faamaonia ua maua ai i le tale vivini.
O le aga’i atu o le atunuu i aso fiafia ma to’atele aiga mai fafo i Niu Sila ma Ausetalia o loo pipisi ai foi e tale vivini, ua fautuaina e le Sui Faatonu Sili aiga i lo tatou atunuu e fesoota’i ma aiga i fafo o loo tapena malaga mai, ina ia fai ni o latou tuipuipui a o le’i malaga mai mo faiga mālōlōga o le faai’uga o le tausaga.
O se tasi lea o auala sili ona tāua e pei ona faailoa e le Sui Faatonu Sili aoao o le soifua mālōlōina e puipuia ai lo tatou atunuu i Samoa.
O loo tumau pea faamaumauga a le soifua mālōlōina i le to’aono o tagata i le atunuu ua faamaonia ua maua i le tale vivini, o se faama’i e leai se eseesega o ona āuga ma le gasegase o le flu e pei o le fiva, tiga ma niniva le ulu, gagase tino ma tale.
Le Sui Faatonu Sili o le soifua mālōlōina le susuga i le alii foma’i le afioga Tagaloa Dr Robert Thompsen i se polokalame a le matagaluega i ana auala o fesoota’iga televavave.
