O se fiafiaga tele i le asosi tenisi a Samoa ina ua faamanuiaina le taumafaiga a i latou sa tauva i le taamilosaga tenisi i Fiti. 

O lenei taamilosaga sa amataina i le aso 31 o Me ma faamae’a ai i le aso 4 o le masina nei. 

E toafa i latou sa fai ma sui o Samoa i lenei taamilosaga, toalua alii toalua foi tamaitai ma o le vaega o alii lea na manumalo ai Marvin Soonalole i pine auro e 2 faapea ai le pineauro ma le pine siliva na maua e Darrius Carruthers.

E 2 pine siliva sa mauaina e le itupa o tamaitai ia Eleanor Schuster ma Roselyn Tupuola. 

Na taua e le Sui Peresitene o le Asosi, Yvonne Carruthers le tulaga e o loo manaomia ai le falauaitele o le atina’e a le taaloga tenisi i le atunuu.

“E manaonia le tele o taamilosaga e taaalo ai, e fesoasoani e malosi ai le mafaufau ma ia maua ai le to’a i taimi e taaalo ai.”

O le faaiuga o le masina nei lea o le faalauiloa ai le ‘au tenisi a Samoa mo tapenaga i taaloga a le Pasefika lea o le a faia i le Atu Solomona.

O lenei taamilosaga sa auai ai Ausetalia ma Niu Sila faatasi ai ma nisi ‘au mai atunuu o le Pasefika.