E lua ni faalapotopotoga tuma’oti i Samoa ua masaa iai le fesoasoani tupe a le polokalame fesoasoani a le Malo o Amerika e tusa ma le 3 tesimale 9 miliona tala Samoa poo le tasi tesimale 5 miliona tupe Amerika.

O le faalapotopotoga o le Adventist Development and Relief Agency Samoa o le a maua le silia i le 532 afe tala Amerika ae o le faalapotopotoga o tina faipisinisi le Women in Business Development o le a latou maua le silia i le 997 afe tala.

O faalapotopotoga nei e lua o loo faia polokalame tau atina’e mo le siitia o le soifuaga lelei i totonu o nuu ma afioaga, ma le faamalosia o le tulaga siitia o galuega e atiina a’e ai tina ma tamaitai o Samoa.

Ua latou faia foi polokalame e unaia ai taumafaiga tau faatoaga e pei o le laau o le niu mo le gaosia o le suauu popo o loo faatau atu i fafo.

O le faalapotopotoga o tina faipisinisi o Samoa o loo unaia lea taumafaiga, ma ua toatele aiga o le atunuu ua faamanuiaina ai i seleni i le faatau atu o le popo i lea faalapotopotoga mo le gaosiga o le suauu popo le coconut virgin oil.

O le tausaga e 2020 na amata faailoa ai e fesoasoani a le Malo o Amerika le ave o lana faamamafa e fesoasoani ai i le atiina a’e o taumafaiga mo le manuia o tagata e ala i faatoaga, ma polokalame e tetee atu ai i suiga o le tau.