O le sao tau tupe o faalapotopotoga tumaoti a le Malo i le faatinoina o galuega fai mo le atina’e o le atunuu i soo se itu, o se tasi lea o faamoemoega o le Malo i le faatupeina o ana galuega, e ese mai tupe o loo faameaalofa mai e ana paaga i fafo.
O le pulega o uafu o se tasi lea faalapotopotoga tumaoti a le Malo ua molimauina pea i tausaga uma le siitia o ana tupe maua mai ana auaunaga, ma faapena ona vavae ese se isi vaega o ana tupe faasili poo polofiti ma faaoo atu i aao o le Malo mo lana faasoa.
E silia i le 3 miliona 737 afe ma le 974 tala ($3,737,974) le siakitupe ua tauaao e le tamaitai Palemia mai lea faalapotopotoga, sa tauaao atu e le Minisita o Galuega tetele ma Pulega o Uafu le tofa Olo Afoa Fiti Vaai i le faaiuga o le vaiaso na tea nei.
O lea seleni tele ua mafai ona maua e le Malo mai le aofaiga o tupe faasili a le faalapotopotoga e $10 miliona 679 afe 925 tala na aoina i totonu o le tausaga faaletupe na faaiuina i le masina o Iuni o le tausaga e 2022 poo le tausaga na tea nei.
Ua faaalia e le Minisita o loo tulimatai nei se isi siitaga i tupe faasili poo polofiti a le Pulega o Uafu, ona o le tausaga nei o le a faaopoopo ma siitia le numera o vaa tetele e afea le atunuu, aemaise o meli laupasese.
