I le toa 29 na faamanuiaina i le suega ulufale a le Kolisi Faafaifeau i Malua i le tausaga na tea nei, e toa 28 ua sauni mo aoaoga o lenei tausaga fou ae o le isi toatasi e faatoa a’e i le tausaga asau 2024.
O le taunuuga lea o le vaega tāua mo A’oa’o e fia ulufale i le kolisi faafaifeau, o le laasaga mulimuli o le faia o le Tautinoga lea sa faagasolo i le Aso Lua o le vaiaso nei.
O Aokuso o le tausaga na tea nei na faia ai le suega ulufale mo Malua ae o Oketopa o lena tausaga lava na faailoa ai le toa 29 o i latou na pasi mataupu uma o le suega ulufale.
O le Tautinoga o se laasaga lea o tapenaga mo ē ua talia, e toe faatalanoa ai ma faailoa atu foi le tulaga atoatoa o iai le soifua maloloina, o se tasi o vaega tāua mo ē uma e ulufale i le kolisi faafaifeau mo le 4 tausaga o aoaoga, a o lei faauu ma sauni i le galuega faafaifeau.
O le taunuuga o le tusigaigoa na faia i le tausaga na tea nei, ua faamauina ai o le Ekalesia Faapotopotoga Kerisiano Samoa poo le EFKS, o le ekalesia pito toatele tagata o le tatou atunuu o loo tapuai ai.
O lea faamaumauga e le o faitauina ai tagata lolotu o lea ekalesia o loo faamautu ma aumau i atunuu mamao.
