Ua faitau itula nei ona mou atu lea o lenei tausaga 2025 ae o le a lē galo mea lelei sa tutupu ai, faapea foi ona lē galo ē pele ua fano ola ma soifua i gasegase o le tino faapea faama’i, aemaise o faalavelave na tutupu faafuase’i e le’i mafaufauina.
O le a tatou faatofa atu foi i lenei tausaga 2025 sa molimauina ai le fetineia’i o manatu ma finagalo faaalia o ta’ita’i o le malo ina ua va le fogavaa i le lotoifale o le vaega faaupufai o le Faatuatua i le Atua Samoa ua Tasi na sosofaina le malosi o pulegamalo a le patī e puipuia aiā tatau a tagata sa tu i le foe mo le lata i le 40 tausaga, ina ua mae’a le palota tele o le 2021, ma le palota tele faafuase’i ia Aokuso o le tausaga nei.
O le amataga o lenei tausaga o le a mae’a sa tatou feiloa’i ai pea ma lu’itau i le pipisi o le faama’i o le tale vivini, ae na alu alu sosoo ma le pipisi o le faama’i o le fiva o ponaivi lea na fano ai ola ma soifua e fitu.
O se faama’i na amata lava le tausaga o fautuaina ai le atunuu ae o Aperila na faailoa ai e le soifua mālōlōina le pepesi ma faatino ai galuega o le puipuiga o le soifua o fanau ma tupulaga na pito sili ona aafia.
O Ianuari o lenei tausaga na amata i le gasegase faalotoifale o le vaega faaupufai o le Faatuatua i le Atua Samoa ua Tasi ina ua faia e leoleo moliaga faasaga i le Minisita o le Kapeneta le susuga Laaulialemalietoa Leuatea Polataivao Fosi, i le ulua’i faigāmalo a le Faatuatua i le Atua Samoa ua Tasi sa ta’ita’i ai le ulua’i tama’ita’i Palemia le afioga Fiame Naomi Mataafa.
O le amataga lea o maseiga na tutupu ai i le lotoifale o sui faipule o le faafaletui ma vaeluaina ai.
Na faaauau atu lena lē mautonu i le Palemene ma faatū ai le lafo e le Itu Agai e teena le tala autū o le tupe i le faai’uga o le masina o Me ma sa lagolago e le sui faipule o Gagaifomauga 3 ua avea ma ta’ita’i o le itu faaupufai o loo faafoeina le malo ma le 19 o faipule o le Faatuatua i le Atua Samoa ua Tasi.
Na manumālō le lafo ma teena ai le tala o le tupe ma fautuaina ai e le Palemia le faata’ape o le Paea’iga 17 a le Palemene, lea na taunuu i le palota tele ia Aokuso ma toe manumālō mai ai le Faatuatua i le Atua Samoa ua Tasi ma le faipule o Gagaifomauga 3 ua avea nei ma Palemia lona valu o le malo o Samoa, susuga Laaulialemalietoa Leuatea Polataivao Fosi.
O se tasi o pine faamau o le Paea’iga 17 a le Palemene na faata’ape ia Me o lenei tausaga 2025 ae e le’i mae’a le lima tausaga o lea paea’iga, o taumafaiga a le Itu Agai e aveese le ulua’i tama’ita’i Palemia ma lana pulegamalo o minisita e 15, i le lafo o le lē faatuatuaina.
E le’i saofia lea taumafaiga ina ua lagolagoina pea e le to’atele o faipule o le Faatuatua i le Atua Samoa ua Tasi le malo.
O le lafo lona lua o le lē faatuatuaina na tuuina atu e le ta’ita’i ma le vaega to’atele o lea pati faaupufai e le’i saofia foi auā na teena e le Itu Agai.
Na faato’ā mafai ona faamuta pulega a le sui faipule o Lotofaga a o avea ma Palemia ma lana Kapeneta, ina ua manumālō le lafo na faatū e le Itu Agai poo le vaega e puipuia aiā tatau a tagata na teena ai le tala faatatau autū o le tupe.
Na manumālō lea taumafaiga mulimuli ina ua lalago ma opogi e le faafaletui o faipule e 20 o le Faatuatua i le Atua Samoa ua Tasi.
E ese mai ia tulaga sa tutupu ma aliali mai i le faigāmalo ua mavae, o le a manatua foi lenei tausaga 2025 i le taimi muamua ua faatū ai e se Minisita o le Kapeneta o le Paea’iga 17 a le Palemene se lafo e faamālōlō ai le tofi o le Fofoga Fetalai.
O se taumafaiga e le’i mafai ona faatino ona e leai se aiaiga i le faavae e mafai ai ona faia sea tulaga.
O le a manatua foi le 2025 ma le Paea’iga 17 a le Palemene i le taimi muamua ua palota ai le Fofoga Fetalai i le sa’ilia o le lua vae tolu o nofoa e 52 o le Palemene na manumālō ai teuteuga o le faavae na tuuina atu e le faigāmalo talu ai, ua toe foi ai le faamasinoga a le atunuu i le pulega e tasi e pei ona faauluulu i le afioga i le Faamasino Sili.
