Ua tapena le pulega o tagata tafafao mai fafo, faapea le asosi o faletalimalo a Samoa, ae lagolago iai nisi o auaunaga a le Malo i le faatinoina o polokalame mo le faafeiloaiina o le pepe o le Kerisimasi ma le Tausaga Fou 2024.
Ua faailoa e le komiti o tapenaga i se feiloaiga ma tusitala o le Aso Lulu asau e amata ai lea polokalame i le faalauiloaina o le tama o le kerisimasi o le a faia lana tufaga meaalofa i le solo a taavale i le Aso Lulu asau.
Ae sosoo ai ma pesepesega faaleagaga o le kerisimasi i le po lava o le aso lea ma toe faaauau i le Aso Tofi o le vaiaso lava asau.
O po o ia aso e lua o le maketi mo faipisinisi e faatau ai meataumafa ma isi oloa le market night i le nofoaga mo tagata tafafao i tua ane o le Maota Samoa o le pulega o tagata tafafao i le eleele fou.
O le po o le vaeluaga o le Aso Sa a o lumanai le aso muamua o le tausaga fou, o le faaaliga o mea faapāpā poo fireworks display e faia i gataifale o le taulaga i Apia ma le faaaliga foi o mea faapāpā i Savaii e faia lea i gataifale o le nuu o Faga.
O le nofoaga foi lea na faia ai i le tausaga ua mavae.
Ua faailoa e le komiti e luaselau afe tala Niu Sila le tau atoa o tapenaga o mea faapāpā e aofia ai ni kamupani se lua ua ave iai lea galuega.
