Ua savalia nei le fā tausaga e le o toe totogia e le pisinisi o le Tatiana Investments o loo faagaioia le fale kalapu o le R.S.A. se tupe o le lisi o le fanua o le Malo o loo iai lea atina’e tau pisinisi.

Ua nofo aitalafu ai le Tatiana Investments i le matagaluega o punaoa faalenatura ma siosiomaga o loo iai le vaaia o fanua lisi o le Malo i se vaegatupe e silia ma le luaselau afe tala.

Ua faailoa e le Minisita o le Matagaluega lea tulaga ina ua tuliloa i ni fesili e faatatau i lenei mataupu, ma se fuafuaga a le matagaluega i sana faaiuga pe faamuta pe faaauau pea ona faagaioi le pisinisi i lea vaega eleele o le Malo o loo i le taulotoaiga o le taulaga o Apia. 

Na faaalia foi e le minisita o Puna’oa Faalenatura ma Siosiomaga le afioga Toeolesulusulu Cedric Schuster, sa iai se galuega na fuafua le faigamalo sa iai e fausia i le fanua o loo iai lea pisinisi, e pei ona faailoa mai e le afioga Afoa Faleulu Mauli ina ua tāpā sona finagalo.

O le ofisa autu o le faalapotopotoga o fale, le Housing Corporation sa fuafua e fausia ai i le fanua.

Talu mai lena taimi sa faia le isi fetuunaiga a le faigamalo ua mavae ma le Tatiana Investments e lisi tai ono masina le fanua ma faafou, peitai e oo mai i le taimi nei e lei faatinoina lena fuafuaga.

Le Minisita o le Matagaluega o Puna’oa Faalenatura ma Siosiomaga, Afioga Toeolesulusulu Cedric Schuster.