Ua silia i le 20 tausaga talu ona molo’aua taaloga o le Samoa Games e lei toe faia lava, ae o lea ua toe iai le finagalo o le Malo e faatino ia taaloga mo le unaia o le atina’e o soo se taaloga i le atunuu ina ia siitia ai le tulaga lelei o tagata taaalo e fai ma sui o Samoa i tausinioga faavaomalo.
E 200 afe tala se vaegatupe ua pasia mo le faatinoina o ia taaloga, ua iai le talitonuga e silia i le toa afe tagata taaalo o le a auai, e le gata o ‘au masii mai fafo, ae faapea foi i totonu o le atunuu. Ua avea foi taaloga o le Samoa Games o se tasi o polokalame o le faaiuina o le faailogaina o le 60 tausaga o le tutoatasi.
Faaalia e le Ofisa Sili o pulega o le ofisa o le faalapotopotoga o taaloga a Samoa le SASNOC, le afioga Tuala Mathew Vaea, o loo tapena lava e le itutino poo le faalapotopotoga o taaloga eseese i le atunuu a latou polokalame, e pei o le faalapotopotoga o faipelega, o loo tapena i le tausinioga o fusuaga a atunuu o le Oceania e faia mai i Samoa i le faaiuga o le masina nei o Me.
Le afioga Tuala Mathew Vaea, o le Ofisa Sili o le SASNOC.
E 22 taaloga e faia tonu i le vaiaso o le Samoa Games lea e tatala aloaia i le Aso Toonai o le vaiaso nei.
O taaloga ia e aofia ai afeleti, badminton, basketball, kilikiti, tuuga uila vilivae le cycling, taaloga soka, hockey, netipolo, lakapi iuni ma le lakapi liki, tuuga vaa faila, taaloga fanafana, tenisi i luga o le laulau le bing bong, taaloga o le taekwondo, o le tag rugby faapea le lakapi pa’i, tenisi, triathlon, volipolo, siisii uamea mamafa ma faipelega.
E amata taaloga nei i le Aso Toonai nei, ae mae’a i le Aso Toonai mulimuli o lenei masina le aso 27 o Me.
O faipelega e faatoa amata i le Aso Gafua 29 o Me ma e faamoemoe e mae’a i le Aso Lulu 31 o le masina nei lava.
E faapena foi i taaloga volipolo lea e iai ‘au mai Amerika Samoa o le a tausinio ai.
O le autu poo le Theme o taaloga o le Samoa Games, o le amanaia o le sao o soo se taaloga i le atina’e o le tatou atunuu.
