A o feagai fanau i le atunuu ma malologa o le kuata muamua o lenei tausaga, e valu aulakapi taitoafitu a aoga tulagalua i Savaii ma le 12 o ‘au mai aoga tulagalua i Upolu o le a tausinio i le taamilosaga lakapi fitu a aoga tulagalua i le atunuu, e saili ai le siamupini o le Ipu a le Palemia mo lenei tausaga.

O le Aso Lulu le ogatotonu o lenei vaiaso ma le Aso Tofi o le a faagasolo ai lenei taamilosaga i le malae a le Kolisi o Sagato Iosefo i Alafua.

E fā pulu ua vaevae iai le taamilosaga lea ua faailoa o le Pulu A o le a tausinio ai ‘au mai le Faasaleleaga 1, Safata, Anoamaa 2, Savaii Sisifo, ma le Itu o Asau Numera 1.

O le Pulu B ua faatulaga ai ‘au mai Vaimauga 2, Sagaga 1, Anoamaa 1, Lepa/Lotofaga, ma le Itu o Tane 2.

O le Pulu C o le a taaalo ai Falealii ma Siumu, Faasaleleaga 2, Vaimauga 1, Sagaga 2 ma Faleata 1.

Ma le Pulu D o loo faatulaga mai ai Itu o Tane 1, Itu o Asau 2, Aana 1, Palauli, ma Faleata 2.

O ‘au e lua pito i luga mai pulu taitasi o le a sao atu i quarter finals ma faasolo ai seia oo ina iloa au e sao i le sailiga o le siamupini mo le Ipu a le Palemia.

O loo galulue faatasi le Lakapi Samoa ma le Matagaluega o Aoga Taaloga ma Aganuu i le faatinoina o lea taamilosaga lakapi taitoafitu mo fanau i aoga tulagalua uma i Samoa.