Ua ave le faafetai a le Malo e ala mai i le Minisita o le Matagaluega o Alamanuia, Pisinisi ma Leipa le tofa Leatinuu Wayne Sooialo, i le sailimalo ma le lotonuu moni o alo ma fanau a Samoa sa tausinio i taaloga a Malo o le Taupulega i le lua masina ua mavae, ua a’e manuia ai a latou taumafaiga i taaloga sa tausinio ai ma manumalo i ni pine ua tauleleia ai le igoa o Samoa i faagatama faavaomalo i taaloga.
O le faaiuga o le vaiaso na tauaao ai e le Minisita e avea ai ma sui o le Malo taui tupe mo lē na manumalo i le pine auro i taaloga siisii uamea mamafa le susuga Don Opeloge e $20,000 tala, ma le $10,000 mo le faiaoga o le ausiisii uamea mamafa a Samoa le afioga Tuaopepe Jerry Wallwork.
Peitai o le sefulu afe tala a le faiaoga, ua ia tufatufa mo i latou sa faamanuiaina foi le taumafai i pine siliva ma apa memea. E lei afea i latou ia i le tufaga meaalofa tupe ona o le faiga faavae sa amata ai lea fuafuaga i tausaga ua mavae e nao ē, e ausia le pine auro.
Se vaega o le saunoga a le Minisita le tofa Leatinuu Wayne Sooialo i le sauniga na tauaao ai meaalofa tupe mai le Malo.
