I le faatoa maua o se kopi o le lipoti a le komiti filifilia o tulaga aloaia ma amioga taualoa a le Palemene, ua talia e le Fono Aoao le latou faasalaga 2 tausaga e faamalolo ai sui faipule o Lepa ma Faleata 3.

O sui e toaiva o le komiti e aofia ai le taitaifono, le Minisita o le Soifua Maloloina, e toalua sui la te lei sainia le lipoti ma o sui foi ia e lei sainia le lipoti muamua.

O i laua ia o le afioga Lautafi Fio Selafi Purcell ma le tofa Faimalotoa Kika Stowers Ah Kau. E toafa sui o le vaega e puipuia aiātatau na filifilia i le komiti ae toalima o sui mai le itu a le Malo le vaega faaupufai o le Faatuatua i le Atua Samoa ua Tasi.

O le fautuaga a le komiti e faamalolo mo le lua tausaga poo le 24 masina le susuga Tuilaepa L Sailele Malielegaoi ma le tofa Lealailepule Rimoni Aiafi, o isi sui usufono e toalua o le pati faaupufai e puipuia aiātatau a tagata o sui foi o le komiti, le tofa Ale Vena Ale ma le tofa Tuuu Anasii Leota sa saini o la suafa o le faailoga o le la taliaina foi o le lipoti.

Na faailoa e le taitaifono i lana folasaga i le Palemene o le sainia ma le lē saini o se sui o se komiti o lana lea aiātatau.

I le palota faalilolilo na saili ai le teena ma le lagolagoina o le lipoti, e toa 20 sui faipule o le Itu agai sa auai i le taimi o lea palota tau valaau, peitai e toa 19 na teena le lipoti.

E toa 28 sui faipule o le itu a le faigamalo sa auai i le palota tauvalaau, e le aofia ai le fofoga fetalai, ae o le faaiuga o le palota e 29 na lagolago i le lipoti.

Pe ana talia e le fofoga fetalai le finagalo o le taitai o le itu agai e faatino le palota tau valaau, semanu e iloa ai sui faipule o itumalo e lagolagoina le faasalaga, ma i latou e teena.

O sui faipule ua toe faamalolo le tumau e lei palotaina o la tofi ina ua toe autasi iai finagalo lagolago o itumalo o Lepa ma Faleata 3 i le palota tele a le atunuu ia Aperila o le tausaga na tea nei.