O le ta o le 5 i le afiafi o le Aso Lulu le aso 2 o Novema 2022, na tapunia ai talosaga mo tagatanuu o Samoa e fia nofomau i Niu Sila, i aiaiga o le polokalame o le Quota scheme.
E iai le talitonuga e toatele nisi sa talosaga mo lea avanoa, aua ua silia ma le lua tausaga o taofia le polokalame ona o tulaga sa pesia ai le lalolagi i le faamai Koviti-19.
E 1,650 avanoa mo nisi mai Samoa e mafai ona maua le nofomau i Niu Sila ina ua toe tatala le quota, peitai e faatoa iloa pe maua uma lea aofaiga, ona e fua i le faamalieina o aiaiga e mafai ai ona maua le nofomau i Aotearoa.
O le numela masani sa iai e 1,100 ae ua faaopoopo le isi 550 avanoa nofomau ma e le o iloa le mafuaaga. O le aso 2 o le masina fou o Tesema o le a faia ai le se’i e iloa ai talosaga o le a faamanuiaina, ma faagasolo ai loa tapenaga mo ē o le a laki i le se’i mo le umi e valu masina.
O lona uiga e tatau ona oo atu i le masina o Aokuso o le tausaga fou 2023 ua mautu le faia o pepa ma ua maua foi pepa faigaluega ma amata tuua Samoa e i latou o le a manuia i le nofomau i Niu Sila.
