I le 15,374 o tagata ua aafia i le siama o le Koviti-19 i faamaumauga mulimuli mai le soifua mālōlōina, o lea ua faaopoopo isi gasegase fou e 31 ona siitia maualuga ai lea o le aofa’iga o ē ua aafia e aofia ai pasese malaga mai fafo i le aofaiga e 15,405.
O le 31 o gasegase fou o le 30 e mai le lautele o le atunuu ae o le to’atasi o se tagata malaga mai fafo. O faamaumauga ia i le lua aso mai le aso 25 i le aso 27 o le masina na te’a nei o Iulai. E to’afā gasegase o le koviti o loo taofia i nofoaga faapitoa i le maota gasegase i Motootua ae leai se gasegase i potu tigaina.
O loo faamalosia pea fautuaga o puipuiga lautele mai le faama’i ma o le augani lea ma le tātālogo a le matagaluega o le soifua mālōlōina i le atunuu, ia faia puni fofoga ma tausi le tutū ma le nonofo vāvā e lua mita, ma ia faia tuipuipui mo i latou e agavaa i tui e lua ma tui faaopoopo.
