O le aso 29 o Setema o lenei tausaga 2022, le Aso Tofi o lenei vaiaso ua atoa ai le 13 tausaga o le faalavelave faanatura o le sunami poo galu lolo poo galu afi na mafua mai i ni mafui’e se lua o le malosi pe a tuufaatasi e 8 tesimale 3 i le masini fua mafui’e.
O se faalavelave matautia e le o galo i loto ma mafaufau, ona o le tele o meatotino tāua ma aoga na faaleagaina, ae o soifua o tagata e 149 i Samoa lava ia na fano ai ma o le toatele o fanauiti. O le fanua maliu i Tafaigata o loo tanumia ai le sefulutasi o tino maliliu mai lea faalavelave.
O le tuanai o le sunami i le aso 29 o Setema o le tausaga e 2009, na faia ai i le aso 5 o Oketopa o le tausaga lava lena, le sauniga faamanatu poo se memorial service ma sa faailoa ai e le Malo i lena taimi, le faamanatu ai o lea aso faanoanoa i tausaga taitasi.
Peitai na muta ai lava lea fuafuaga e oo mai i le taimi nei, ae ua na o aiga o e na maliliu ma nuu ma afioaga na matua aafia o loo faaauau pea ona latou faamanatu lea faalavelave matautia faalenatura.
O le masina foi o Setema o le tausaga 2009 na tulai mai ai le sunami, na amata ai le suiga o le itu o le auala e feoai ai taavale ma faaaoga ai taavale foeuli taumatau. O le aso 7 o lena masina na amata aloaia ai, ae tuanai ni vaiaso talu lea suiga fou i Samoa ae afea Samoa i mafuie tetele e lua ma tulai mai ai le sunami.
Ua 13 ai nei tausaga talu ona faatino le suiga o le itu auala e feoai ai taavale i Samoa. E ui o se suiga sa vavao ai manatu ma finagalo faaalia mai lava i le atunuu e oo i taitai o le malo i lea vaitaimi, ae ua molimauina le tāua o lea suiga i le ulufale mai ai o kamupani faatau taavale, ma tatala ai avanoa i pisinisi e nono ai tupe e pei o faletupe, ua latou fai paaga, ma vave ai ona maua taavale e faaaoga e aiga ma tagata taitoatasi i lo tatou atunuu.
