E 13 i latou ua faamanuiaina i avanoa sikolasipi e aotauina ai i nisi o Iunivesite i Saina.
O le sauniga faamavae na valaaulia ai sui o le Malo o paaga a le ofisa o le Malo o Saina i Samoa nei o mātua ma nisi o alo ma fanau a le atunuu sa aotauina i tausaga ua mavae i lenei atunuu.
Na saunoa le Minisita o Aoga Taaloga ma Aganuu, Seuula Ioane Tuaau le tāua o nei avanoa sikolasipi.
“E iai le talitonuga o mataupu ma polokalame o le a aotauina ai outou o se vaega tāua lea i le atina’e o le atunuu i aso o i luma.
“O le ala e faamalosiau ai ia te outou o le a malaga atu i nei avanoa ia faaaogā tatau ma le faamoemoega a toe taliu mai ia faaaogāina lo outou tomai ma agavaa e aotauina ai alo ma fanau.
“O le a sui le vaai ma le olaga o le a feagai ai i na atunuu e le gata i aoaoga ae o le olaga i aso uma ae ia aua ne’i galo ia tausisi e fesootai mai i outou aiga ma mātua ona o iina e maua ai le mafanafana ma le taiala sili pe a lutia ma feagai ai ma faafitauli.
“Tautuana ma outou le fanua ia outou amio pulea auā e lē aumaua nei avanoa, ua filifilia foi outou mai se fuainumera toatele sa talosaga ae ia faaaogā tatau auā se ‘ai mo nuu aiga ekalesia ma le atunuu.
“E lē uma le loto faafetai i le Malo o Saina e le gata i fesoasoani i atina’e o tatou tagata a o avanoa e faalauaitele ai le malamalama o a tatou fanau ma soo se tasi.”
E silia ma le 300 alo ma fanau a le atunuu sa faamanuiaina i nei avanoa sikolasipi talu mai le tausaga 1982.
