O afio’aga o Asau, Vaisala ma Auala o le itumalo o Vaisigano Numera Muamua ua afea i le agalelei ma le lima foa’i o le malo o Siamani e ala i tanevai e 12 e tusa ma le 3,000 lita o le suāvai e mafai ona teu malu ai.
O se fesoasoani tāua tele o le a maua ai le suāvai e teu lelei e aiga mo le faaaogāina i aso uma.
O le Konesula o Siamani i Samoa sa ia tauaao lea foa’i i le faai’uga o le masina na te’a nei, a o molimauina e le sui faipule o Vaisigano numera muamua le afioga i le Minisita lagolago o galuega tetele le susuga Niuava Eti Malolo.
O tanevai ua maua e afio’aga o lea itumalo faapalota o se galuega ua tauala mai i le malo o Siamani ma tuusa’o i le Fono Faavae a Vaisigano Numera Muamua, o loo feagai ma polokalame o le atina’e manuia o aiga o nuu o lea itumalo i lo tatou motu o Savaii.
O le tasi lea o itumalo o loo maua le suāvai mai le polokalame o vai vili mai le manava o le eleele, peitai o le suāvai timu o le a faapale ma teu i tanevai o se isi lea o faaopoopoga o suāvai mamā mo le soifua manuia o tagata o le itumalo.
