O le fono a tinā ma tamaitai poo le Women’s Forum e pei ona avea o se tasi o polokalame togia o le Fono a Malo o le Taupulega, ua faalauiloa ai ma tinā ma tamaitai e to’a sefululua o Samoa ua faamauina le maualuga ma le maoa’e o lo latou sao e ala i tomai ma matātā eseese i le atina’e o le tatou atunuu.
O le polokalame a le matagaluega o tinā ma tamaitai atina’e o afio’aga ma aga fesoota’i ua lagolago iai le malo o Ausetalia ma le UNICEF ua latou filifilia ia tausala o le atunuu ma o nisi ua fai i lagi le folauga.
Ua faaigoaina lea polokalame o le The Resilient Spirit Portraits of Samoa Women Warriors.
A faasamoa o le “Ia Faaee Malama”.
O i latou e 12 ua filifilia ua aofia ai le tamaitai o Nafanua o se toa o taua anamua e pei o talatuu o Samoa.
O isi ua aofia ai le tamaitai Palemia le afioga i le Sa’o Faapito, Fiame Dr Naomi Mataafa, o le ulua’i tausala o le atunuu ua pale i le tofi Palemia ma ua tele tausaga o lana tautua i upufai o le Malo.
O lona tuaa tinā le afioga i le Masiofo le tofa Laulu Fetauimalemau Mataafa o le ulua’i Komesina Maualuga o Samoa i Niu Sila, ma sa avea foi ma faipule o le Palemene, o le afioga Tooa Salamasina Tamato Malietoa e 50 tausaga o lana tautua i a’oa’oga e pei ona sa avea ma Ulu poo le Pule o le Kolisi o Papauta.
O le afioga Leaupepe Taulapapa Faimaala sa lotolotoi foi i upufai o le malo i le tofi faipule o le Palemene, o tinā ma tamaitai sa tautua i le sailigamalo a Samoa e ala i le Mau.
O le afioga Taulapapa Brenda Heather Latu o le ulua’i tamaitai sa filifilia e avea ma Loia sili a le Malo, o le susuga Aiono Dr Fanaafi Letagaloa o le ulua’i tamaitai na avea ma Faatonusili o Aoga a le Malo, i.
I le itu i taaloga o le tamaitai o Ele Opeloge o le ulua’i tagata taalo ma o se tamaitai ua muamua manumālō i se pine i taaloga a le Olimipeka lea na ia maua le pine siliva.
O le tinā o Siliniu Lina Chang o le Pelesetene o le Toomaga mo ē Puapuagatia o se faalapotopotoga o loo autū i le puipuia o fanau mai sauāga, ma le afioga Niava Mata Tuatagaloa o le ulua’i tamaitai o le atunuu na filifilia e avea ma Faamasino i le Faamasinoga Faaitumalo ma le Faamasinoga Maualuga.
O le tamaitai Palemia ma le ta’ita’i o le tatou Malo na saunoa e faalauiloa lea polokalame ma suafa o tinā ma tamaitai e to’a 12, ma sa ia faailoa ai e to’a sefuluvalu isi tinā o le a faailoa i se taimi o latou suafa ma o ni tausala foi o le atunuu ua iloga lo latou sao i le atina’e o Samoa.
