Faatoa savali nei le fa tausaga talu mai le tausaga e 2019, ona aveesea le tapu a le atunuu o Saudi Arabia na faasā ai tamaitai ona latou aveina se taavale, ma ua faataga nei tamaitai o lea atunuu ona tago i le foeuli o le taavale talu mai lena tapu na amata faamamalu i le tausaga e 1957.
O Samoa o se atunuu temokalasi e leai ni tapu faapea, peitai ua faaalia e le Pule Sili o le Pulega o felauaiga i luga o le laueleele, o a latou sailiiliga na iloa ai e na o le 25 pasene o tamaitai o le atunuu o loo umia laisene avetaavale, ma e iai le talitonuga o loo fua lea pasene i le faitau aofai o le atunuu i le tusigaigoa mulimuli lea ua silia ai i le lua selau afe tagata o loo nonofo i Samoa.
O lona uiga pe na o le 10 afe tina ma tamaitai ua iai o latou laisene avetaavale ma o se aofaiga maualalo tele pe a fua i le numera o le itupa o alii o loo umia laisene avetaavale.
O lea ua mae’a se polokalame a le pulega o felauaiga i luga o le laueleele ua faauu ai tina ma tamaitai e 113 ua maua laisene avetaavale ma ua pasi foi a latou suega e avea ai ma avetaavale.
Faaalia e le Ofisa Sili o lea auaunaga a le Malo, na amata le polokalame i le taimi muamua sa manaomia le selau o tamaitai i Upolu ma Savaii, ae na oo i le aso e lesitala ai tamaitai e fia auai, ua oo i le 313 tamaitai na fia maua ni laisene avetaavale.
Le afioga Galumalemana Taatialeoitiiti Schwalger o le Ofisa sili o pulega o felauaiga i luga o le laueleele poo le Samoa Land Transport Authority.
