O nei pusa tusi na tauaaoina e le Faatonu o le faalapotopotoga a le Brown Girl Woke o Doris Tulifau sa fesoasoani ai le kalapu a le Apia Lions mo ana polokalame faagasolo.
O lenei meaalofa o tusi faitau e pei ona ta’ua e Tulifau o le a fesoasoani lea i aoga i totonu o le atunuu.
“O le faamoemoe o le tuuina atu o nei tusi faitau o le agaga e unaia le faitau tusi a alo ma fanau e amata mai lava i aoga amata seia oo i luga i Kolisi maualuluga.”
O tusi e pei ona foaiina e aofia ai tusi mo aoga amata, aoga tulagalua, kolisi faapea luga i iunivesite.
“E iai lava nisi o aoga e le o iai ni potu tusi e agai iai fanau e faitau tusi e pei ona matou maitau i nisi o aoga sa oo atu iai la matou polokalame lenei.
“O le fuafuaga lea ua iai mo le tausaga fou poo ai aoga e fia auai i lenei polokalame matou te tuuina atu pusa tusi nei ae ia taliaina le oo atu o a matou sui i taimi e tuua ai aoga a le fanau e faia ai faitauga tusi e tasi lava i le vaiaso ona faia lenei tulaga ina ia mautinoa o loo faaaogā nei tusi.”
Na ta’ua e Tulifau o loo fuafua foi le faasafua atu o lenei fesoasoani i le tele o aoga i le motu tele i Salafai e pei ona iai nisi o aoga amata sa auai i lenei polokalame.
