E silia ma le 1.4 miliona tui o le Koviti ua lafoai ona o lea ua uma aso e aogā ai e ui e lei faaaogaina.
E 870,000 tui ua uma ona lafoai e le Te Whatu Ora ma o lea ua tapena le isi 570,000 e lafoai auā e uma le aoga i le Aso Faraile nei.
O tui nei ua lafoa’i o le uluai vailaau a le Pfizer, e ese mai i le vailaau fou lea ua ta’ua o le bivalent jab lea e mo na o i latou e moomia o se booster.
O le bivalent foi lenei e amata agavaa ai tagata mai le uluai aso o Aperila, poo le Aso Toonai nei.
A o lafoai ai nei tui, ae ua sau ai ma le tala e na o le 47% o tagata e agavaa mo le booster lona lua ua uma o latou tui, ma o lona uiga o le tusa ma le 780,000 e lei faia.
Ae mai le sui o le soifua maloloina, o le tele o nei vailaau ma’umau e lei faapea ona ua soona oka ona o lea lava foi sa faamuamua le faamautinoa e tofusia uma tagata agavaa o Niu Sila i tui o le Koviti.
