O le savalia ai nei o le fā masina talu ona faamauina le finagalo o le Kapeneta ia toe teuteuina le faavae ma le tulafono o Faamasinoga o Fanua ma Suafa o le tausaga e 2020, ua faailoa e se molimau faatuatuaina o le faia o ia teuteuga ua logoina ai e le Matagaluega o Faamasinoga ma le Faafoeina o Mataupu tau Faamasinoga, le sosaiete a loia i Samoa ma le Peresetene o le Faamasinoga o Fanua ma Suafa.
O lea logo ua faatino ina ua mae’a ona faailoa e le Ofisa Sili o le pulega o lea matagaluega le Faamasino Sili le afioga Satiu Simativa Perese e tusa ai o lea finagalo o le Kapeneta e ala i se iugafono.
E sefulu teuteuga ua fuafua e toe suia ai vaega na teuteu muamua ai le faavae ma fausia ai le tulafono o Faamasinoga o Fanua ma Suafa o le tausaga e 2020 lea na mafua ai ona sa’i lagona o nisi o le atunuu aemaise o le tusi a faamasino o le Faamasinoga Maualuga ma le Faamasinoga Faaitumalo na teena ai teuteuga na pasia e le Palemene i le tausaga e 2020.
Ua faailoa i se pepa o faaiuga a le Kapeneta na faamauina i lana fonotaga o le aso 13 o Tesema o le tausaga na tea nei 2023, teuteuga o le a toe faia e aofia ai le:
- Ia toe faafoi le faatulagaga poo le structure o le Faamasinoga a Samoa i le mea sa iai muamua, ia faaulu tasi uma i le Faamasino Sili
- Ia toe faafoi mataupu uma tau iloiloga poo judicial review e tagofia e le Faamasinoga Sili ma nisi mataupu e aafia ai aiātatau faalefaavae tau fanua faaleaganuu ma sulfa matai
- Ia toe faafoi le puleaga a le Faamasinoga o Fanua ma Suafa i le tulaga sa iai le Tulafono tuai, e ala lea i le tatau ona tali le faamasinoga i mataupu o loo tuuina mai i le talosaga autu
- E lē tatau ona iai se puleaga faitalia a le Faamasinoga o Fanua ma Suafa e fai ai e latou ni faaiuga i ni mataupu e lē o tuuina mai i le talosaga autu
- Ia faalēaogāina le fuaiupu 43 ma le 44 o le Tulafono o Fanua ma Suafa 2020 ina ia taofia ona toe tagofia ni faaiuga a le Faamasinoga o Fanua ma Suafa, e faia i lalo o le Tulafono o Fanua ma Suafa 1981 poo tua atu o Mati 2021, ina ua faamamaluina le Tulafono o Fanua ma Suafa 2020
- Le teena o le toe faatinoina o ni suafa matai taualoa poo honorary title mo ni tagata e lē o ni tagata Samoa
- Ia taoto pea i aiga le filifiliga saoloto o suafa matai mo i latou sa tuli ni faasalaga faafalepuipui
- E tatau ona auai le nofo i le aso o lana saofai faaleaganuu
- Ia faapafala le faatulafonoina o le filifiliga o matai Sa’o ae taoto pea i finagalo o aiga
- Ia faatumauina pea le malosiaga o le faatinoina o pepa saofa’i i sui o nu’u (Pulenuu) ma o le osiganuu aloaia o loo iai le sui o le Nuu
Ua tāpā le ofisa o le Loia Sili mo le tapenaina o teuteuga o le tulafono, ma ua tāpā foi le matagaluega o faamasinoga ma le faafoeina o mataupu tau faamasinoga mo le faatinoina o faatalanoaga faalauaitele ma le atunuu. O nisi o ia faatalanoaga sa faatino i le ‘afa muamua o le tausaga ua mavae, ma ua iai le talitonuga, o le fono a le Palemene i le masina o Aukuso e oo atu ai ia teuteuga i le Fono Aoao Faitulafono.
