Ua iai se faamata’u i ni aafiaga o polokalame eseese a le faalapotopotoga o le soifua mālōlōina o le lalolagi, o loo manuia ai atunuu tau atia’e ma maualalo tamaoaiga e pei o Samoa, ona o lea ua faamautū e le Pelesetene ua iai nei o le Malo o Amerika o Donald Trump, e faamuta le toe avea o le Iunaite Setete o Amerika ma atunuu e lagolago i polokalame a le WHO le faalapotopotoga o le soifua mālōlōina o le lalolagi.
O upega tafa’ilagi ma auala o fesoota’iga televavave o loo faailoa ai e lea faalapotopotoga tele e iai lona faamoemoe o le a toe liuliu se tofa ma se finagalo o ta’ita’i o le malo o Amerika ina ia lē taunuu lana fuafuaga, auā o se tasi lea o atunuu faavae poo se founding member o le WHO mai le tausaga e 1948.
O le miliona ma miliona o tagata o le lalolagi ua faaalia e lea faalapotopotoga o le a lamatia lo latou ola soifua mālōlōina pe afai ae faamaamulu lea malo mauoloa ma malosi lona tamaoaiga o loo tele lona sao i le faatupeina o ana polokalame.
I Samoa lava ia ua faailoa se finagalo o le Faatonu Sili o le soifua mālōlōina le susuga Aiono Dr Alec Ekeroma i auala o fesoota’iga televavave le social media, ma ia faailoa ai e telē se aafiaga mo polokalame faatino tau soifua mālōlōina pe a solomuli ese le malo o Amerika mai le toe avea ma sui o le faalapotopotoga o le soifua mālōlōina o le lalolagi.
Ua ave ai se tuualalo a le faatonu sili i isi paaga totino i le lalolagi ina ia galulue faatasi e faia se galuega e faatalanoa ai ma le malo o Amerika le tāua o lona tumau pea o se sui faavae o le WHO.
O faama’i ogaoga e pei o le Koviti-19 o se tasi lea o ata manino o le tāua o le iai pea o Amerika i tonu fai ma le faagaioia o polokalame a lea faalapotopotoga tau soifua mālōlōina o le lalolagi, o loo maua ai fesoasoani e togafitia ai faama’i eseese.
