Ua unaia e le minisita o le va i fafo a Ausetalia Penny Wong le atunuu o Saina ina ia faaaogā lona malosiaga e musuia ai Rusia ia faamuta loa le taua i Ukraine.
Lipotia e le 9News ua faailoa foi e Wong o le a feiloai foi ma le minisita o le va i fafo a Saina i le fonotaga a le G20 e faia i Indonesia i le faai’uga o le tausaga.
O se saunoaga a le tamaitai minisita na faia i le po anapo i Singapore na ia faaalia ai e tatau ia Saina ona faaaogā ona sootaga malolosi ia Rusia e finau ai e taofia loa vesiga o loo tulai mai.
O loo ta’ua i le lipoti o le masina na te’a nei na toe faamautu ai e le peresetene o Saina Xi Jinping lana lagolago ma lona atunuu ia Rusia i mataupu tau le puipuiga ma le tuto’atasi auala i se telefoni na talanoa ai ma le taitai o Rusia, Vladimir Putin.
