Ua umusa galuega tetele o falea’oga tulagalua e tolu na fausia i se fesoasoani a le malo o Saina i le tau e tusa ma le 30 miliona tālā, o se tasi o pine faamau o le faailogaina i le tausaga nei o le atoaga o le 50 tausaga o sootaga faavaomalo o Samoa ma Saina.
O le falea’oga tulagalua o le Apia Primary i Malifa, falea’oga tulagalua o le a’oga a le Saint Therese i Lepea ma le falea’oga tulagalua o le afio’aga o Lepea ua amata faaaogā nei e fanau ina ua faailogaina ai le mae’a o ia galuega e tolu.
O le Minisita o Tupe ma le tasi o Sui Palemia le afioga Mulipola Anarosa Ale-Molioo sa fai ma sui o le malo na te taliaina lea foa’i mai le sui o le malo o Saina i Samoa le alii Amepasa o Fei Mingxing i se sauniga i le Aso Faraile ua mavae.
O faafiafiaga o lea sauniga tāua sa saunia e se aufaafiafia mai Saina ma se aufaafiafia i Samoa sa faatumulia ai le nofoaga o tu ma aganuu i Malifa o se isi o galuega sa fauasia foi i se fesoasoani a le malo o Saina.
