O le galuega a leoleo na su’esu’eina ai se sauāga na faia i se tinā talavou e pei ona salalau i upega tafa’ilagi se ata vito o lea gaioiga, ua molia ai ni alii se to’alua ma tama’ita’i e to’afā e aofia ai se tinā ua faamatuā tagata.
O le Aso Gafua o lenei vaiaso na tutula’i ai i latou ia e to’aono i le Faamasinoga Maualuga mo le valaauga muamua o o latou moliaga e pei ona tula’i ai le tama’ita’i loia o Unasa Iuni Sapolu mo i latou.
E lua vaiaso ua toe tolopō ai lea faamasinoga se’i tālia ai le faamae’a o moliaga a leoleo, ae o loo faaauau ona tatala uma i latou ia e to’aono i ni aiaiga.
O i latou ua molia e aofia ai Luulau Faisauvale, o Luulau Palau Faisauvale, Malaea Momaga Tanu, Pau Kaio, Talimalama Taualai Kikimanu, ma Lealofi Kaio.
O le aso 8 o Tesema e toe tutula’i ai i latou mo ni a latou tali pe a faamautū moliaga uma a leoleo.
O le gaioiga sa vaaia i le ata vito na salalau i luga o le api o foliga le facebook sa vaaia ai le saisai o lima o le tinā talavou ma faia iai se faaoogalima ae sa umia ai foi e se tinā le seleulu na faatino ai se gaioiga o le ‘oti se’i tulou, o le lauao o le tinā na faia iai lea gaioiga.
