O pusamoa lea na maua o nanā mai ai fuālaau faasāina o le ‘aisa i se uta o faamomoli sa aumai e le vaa la’upasese o le Lady Samoa IV mai Amerika Samoa i le tau lalata i le kelisimasi o le tausaga na te’a nei, ua maua e leoleo tagata sa faamoemoe e ave iai ia fuālaau faasāina.
Faaalia e le sui komesina o leoleo le susuga Leiataualesa Samuelu Afamasaga ua maua le tagata na faamoemoe e ave iai le pusamoa lea na maua ai ‘aisa ma molia ai se taule’ale’a sa galue o se avetaavale mo le minisita o le matāgaluega o le tiute.
E faapena foi le tagata sa faamoemoe e ave iai le pusamoa na nanā mai ai le 6 kilokalama o le ‘aisa lea ua molia ai se tagata sa faigaluega i le vaega o le ofisa faaāsu poo le quarantine.
Peita’i ua faaalia e le sui komesina o loo sa’ili e leoleo le nofoaga o faamautū ai lea tagata.
