Ua atoa nofoa e tolu o le Fono o Sui Tofia ina ua aloa’ia e le Palemene i le taeao o le asō, 17 o Tesema i lana tauaofiaga mulimuli lenei mo lenei tausaga le to’atolu o i latou ua filifilia.
O i latou ua filifilia ua aofia ai lē sa avea ma Ao o le Malo, Afioga Tuiatua Tupua Tamasese Efi, Malietoa Faamausili Moli Malietoa, ma Laulu Tiatia Mapesone Mapuilesua.
O lea filifiliga ua faalauiloa ina ua mae’a ai le lima tausaga o le tautua a lē sa seei i le nofoa o sui o le Fono o Sui Tofia le Afioga Le Mamea Ropati Mualia, e pei ona faailoa e le Afioga i le Fofoga Fetalai i le taeao nei.
O le 2016 na filifilia ai Le Mamea i le tofiga ina ua litaea mai tofiga sa iai i vaega faaupufai sa auai ai e pei o le Samoa National Party (SNDP) o le Tautua Party ma le HRPP.
E lē fou ia Tuiatua Tupua Tamasese Efi le tofiga auā o lea sa seei muamua ai a o le’i avea ai ma Ao o le Malo.
O Malietoa Moli Malietoa sa avea ai ma Peresitene o le RSA i tausaga ua mavae, ae o Laulu Tiatia Mapesone Mapuilesua sa tautua ai i fafo atu o Samoa.
