“Ua tau ai nei i niusina lana faatamasoāliiga, ua i’u ia te ia le tausinioga. Ua pale o ia i le pale o le ola, auā ua mapu ia i aao o lona Faaola”.
O upu amata ia o le finagalo faalaua’itele o le ta’ita’i o le vaega faaupufai o le Samoa ua Potopoto, le afioga Fiame Naomi Mataafa, ua momoli ai lana faamaisega i le tuumalo o se tasi o tamālii sa avea ma faipule o le Paea’iga 17 a le Palemene, ma sa seei i le tofi Minisita o le Kapeneta, le afioga Laumatiamanu Mathew Ringo Purcell, a o avea le sui faipule tama’ita’i o le itumalo faapalota o Lotofaga ma Palemia o Samoa.
O faamaisega a le afioga Fiame Naomi Mataafa ua sa’afi ai i le soifua tautua o Laumatiamanu Mathew Ringo Purcell a o avea ma faipule o le Palemene ona o se tamālii e agamalie, loto maualalo ma tausaafia.
O se tamālii foi e faamuamua ia te ia le manuia o tagata lautele, ma e faamaoni lana lagolago i galuega mo le lelei o le malo ma le atunuu.
O le Aso Sa na tuumalo ai le afioga Laumatiamanu i le maota gasegase i Motootua, ma o ia na ulua’i avea ma minisita o le matāgaluega fou o Taaloga ma Alaga’oa mo le Fiafia o Tagata.
Sa avea o ia ma faipule o le itumalo faapalota o Safata 2 ina ua manumālō i le palota laitiiti a lea itumalo, i le mae’a o le palota tele ia Aperila o le tausaga e 2021.
Sa avea ai ma minisita lagolago o le Matāgaluega o Galuega Tetele ae o Setema o le tausaga e 2023, na filifilia ai i le Kapeneta a le afioga Fiame Naomi Mataafa, ma avea ai ma minisita muamua o le Matāgaluega o Taaloga ma Alaga’oa mo le Fiafia o Tagata.
Na faata’ape le Palemene ia Me o le tausaga na te’a nei ae faaauau ona avea ma minisita o le malo tausi se’ia oo ina mae’a le palota tele faanatinati ia Aokuso o le tausaga ua mavae ma lē toe filifilia ai i le tofi faipule o Safata 2.
Sa tauva o ia i le fu’a a le vaega faaupufai o le Samoa ua Potopoto.
E le’i faamautūina se aso e faia ai ona toe sauniga.
