Na taliga e fia logo le faalogologo a le mamalu o le atunuu, faapea le Pasifika a o tagata Maoli i le malae o le Faautugatagi na saini ai le feagaiga o le Waitangi, a o tulai le tootoo lauga o le afioga ia Aupito Su’a William Sio e momoli le mau a le Pasifka e tali valaau atu ai i le valaaulia na tuuina mai e le aigatupu o le tupu o Maoli ia Kingi Tuheitia Pootatau Te Wherowhero VII.
O le valaaulia sa tuuina mai ia Aupito ma sa talia lava e le afioga ia Aupito lea faatalauula mai o le aigatupu o Maoli ona e tele se fesootaina o Maoli ma Samoa, Tonga, Rarotonga ma Tahiti, ma e lē fou lea fesootaiga.
Saunoa Aupito William Sio, i le taimi na tuumalo ai le Susuga Malietoa Tanumafili II, na faapea ona auai atu ai le tupu lenei o Maoli, ae sa malaga atu ma avatu le ietoga o loo tusia ai le igoa o Salamasina Tooa, e faapea o le ietoga lenei na auina mai i Samoa i le tausaga e 1954 i le maliu o le olomatua e igoa ia Princess Te Puea, ae o le tootoo o Princess Te Puea na ave ma Salamasina Tooa.
Ma o se tasi lea pine faamau o lea sootaga a Samoa ma Maoli.
O le tootoo lauga a le afioga ia Aupito William Sio i lea aso o le feiloaiga o le aigatupu a Maoli sa fai lea ma leo atoa o le Pasifika e aofia ai Samoa, Tonga, Rarotonga ma Tahiti e momoli ai se lagona e galulue faatasi ma Maoli e tau lagolago ai le mau ina ia aua ne’i suia e le faigamalo o loo tulai mai i le taimi lenei le suiga o le feagaiga o faaupuga ma le faavae o le Waitangi.
E tele ni vaega lelei sa faia e Maoli mo tagata Pasifika sa toe ta’ua i le taimi o le lauga a Aupito, ma e tatau foi la i tagata Pasifika ona silasila toto’a i le mau lea ua vevesi ai le malo ma tagata Maoli pe faapefea ona fesoasoani iai le Pasifika mo Maoli i le latou taumafaiga.
O le lanu mumu ma le lanu samasama o mua o le laei (ie) o le afioga ia Aupito na ia faamatalaina lona tāua i lea feiloiaga, o le lanu mumu o le lanu lea o le toto o Iesu na saili malo ai mo tagata atoa uma, ma ua faatusaina foi lea i le toto o mātua ua fai i lagi le folauga sa saili malo auā le manuia o tagatanuu, ae o le lanu samasama ua faatusaina lea i le lanu o le lega samoa e fofo ai ni tiga o le tino ma o le ata foi lea e fofoina ai ni mea o faaletonu o loo tulai mai i totonu o Maoli.
Na maofa foi le taotele o tagata sa auai i lea aso i le tootoo faatamalii o lea tamalii o le atunuu ina ua ia fofolaina le fala i le va o Maoli ma tagata Pasfika.
O le tausaga 2025 i le Waitangi o lea ua tapena ai le Pasfika e toe maua ai le isi feiloaiga ma Maoli ma faamautu ai loa le lagolago ma le galulue faatasi o tanaga whenua ma le Pasifika ina ai aua ne’i suia feagaiga ma faaupuga o le Waitangi.
