O le Onomea Production o se auaunaga tuma’oti ua filifilia nei e na te tapena tauvaga e saili ai ni Tausala o Samoa mo le isi tolu tausaga, e amata atu i le tauvaga o le tausaga lenei.
Ua galulue faatasi ai le Onomea Production ma le kamupani telefoni o le Digicel, o le lagolago autu foi lea poo le major sponsor lea a faatupe e lenei kamupani le faamoemoe, e silia i le miliona tala lona sao i totonu o le tausaga e 3.
O le faaiuga o le vaiaso na faalauiloa aloaia ai le pale atu o le Onomea Production lea ua faauluulu i se tasi o tamaitai o le atunuu sa avea ma Pule Sili o le Matagaluega o Tina ma Tamaitai Atina’e o Afioaga ma Aga Fesootai i ni tausaga ua tuanai, le afioga Leituala Kuiniselani Toelupe-Tago.
O le auaunaga tuma’oti o le Manaia Event sa feagai ma tapenaga o le sailia o se tausala o Samoa i ni tausaga ua tuanai e aofia ai le tausaga ua mavae.
