A o tapena ai le ‘aulakapi tele a le atunuu le Manu Samoa i lana taaloga faitaulia ma Sikotilani i le Aso Faraile 18 o Iulai i le ‘afa o le fitu i le afiafi i le malae o Eden Park i Niu Sila, o lea ua faailoa lautele mai i se faasalalauga le maua e Samoa o faasalalauga tuusa’o o lea taaloga mo lana tapua’iga, e pei ona maua ai e le fale televise o le TV1 i Mulinuu le avanoa na te aumaia ai ia faasalalauga tuusa’o.
O se taaloga ua faaalia o loo to’atele le ‘au fiafia i le lakapi i le lalolagi o loo latou tulimata’i e fia maimoa iai e lē gata o le faatau o pepa mo le ulufale i le malae, ae o auaunaga tau faasalalauga foi i le lalolagi ua latou totogi ni tupe e mafai ai ona latou faasalalau lea taaloga faitaulia.
E sefulutasi kamupani ua latou maua aiā faaletulafono o faasalalauga e faalauiloa ai i le lalolagi le taaloga a le Manu Samoa ma Sikotilani.
