Ua faamanatu nei ma le fiafia e Toelau poo Tokelau le faalauiloaina o le latou ulua’i Tusi Paia ua faaliliuina i le latou lava gagana.
Ta’ua i le leitio faavaomalo a Niu Sila se faamatalaga mai le faafeagaiga o Tui Sopoaga ua ta’ua ai le agaga fiafia ina ua faamae’aina lea galuega sa faaliliuina e Elena Pasilio.
Ua talafeagai tonu ma le faamanatuina o le vaiaso o le gagana Tokelau i Aotearoa ma e lē itiiti tapenaga a le motu ma tagata Tokelau i le faamanatuina o sea tulaga ua ausia.
Fai mai i le 1980 na amata ta’ua ai le faaliliuina i le gagana Tokelau o le Tusi Paia ma amata mai ai le galuega i le 1994.
O le faafeagaiga o Tui Sopoaga ma isi na o latou sa’ilia se faatagana o lea galuega e faia i Niu Sila ma sa lagolago iai le to’atele o tagata Tokelau e aumau i Niu Sila.
O le vaiaso nei la ua alo ai le atumotu i le faamanatuina o nei tulaga tāua ma fai mai le faafeagaiga o le faalauiloaina o le Tusi Paia Tokelau o se faamanatu ina ia faasao ma a’oa’o tagata o le motu e lē gata i le faaleagaga ae ina ia nonofo lelei ai i nuu ma afio’aga.
Puna o Faamatalaga: https://www.rnz.co.nz/international/pacific-news/577052/by-god-s-love-first-ever-complete-tokelauan-bible-launched
