Ua toe oo mai Samoa i le 10 pito i luga o ‘au o loo tausinio i le taamilosaga o le taito’afitu faavaomalo a le lalolagi le HSBC Sevens Series e pei ona faagasolo nei. O le faatulaga aupito lata mai pei ona faaalia i le upega tafailagi a le HSBC ua faailoa ai le iai o Samoa i le tulaga 10 i togi e 56 i le mae’a o le vae o le taamilosaga i Lonetona lea na saili ai e Samoa ma Fiti le manumalo o le pine apa memea ma le tulaga fā.
O le taumafai a le Manu Samoa Sevens na fetaui ai ma Spain i le quarterfinal, ma sao atu ai i le semi ae na faia’ina ai ia Ausetalia. O le taaloga ma Fiti na sailia ai le ‘au e manumalo i le pine apa memea na manumalo ai Fiti ae tulaga fā ai le Manu Samoa.
O le taimi nei i le faatulagana aoao o loo tulaga muamua ai Aferika, tulaga lua Ausetalia, tulaga tolu ai Argentina. O aafiaga o le koviti na lē mafai ai ona auai isi ‘au pei foi o Samoa i isi vae o le taamilosaga mo le tausaga lenei 2022.
Ua ta’ua i le upega tafailagi a le HSBC o le isi vae e sosoo ai o le taamilosaga o Los Angeles i le aso 27 ma le 28 o Aokuso. E manatu le to’atele o se tulaga lelei tele ua toe oo iai le ‘au a le atunuu pe a fua i le tulaga na iai le ‘au i le tuanai.
